You are here:
PacLII >> Vanuatu
>> Konstitusen blong Ripablik blong Vanuatu 1980 (Rev. 1988)
Konstitusen blong Ripablik blong Vanuatu 1980 (rev. 1988)
Download PDF version [1.64MB]
Ol loa blong
Ripablik blong Vanuatu
Konstitusen
LOA IA OLI RIVAESEM LONG 1988
---------------------------------------------------------
KONSTITUSEN BLONG
RIPABLIK BLONG VANUATU
Loa Namba 10
blong 1980
Loa Namba 15
blong 1981
Loa Namba 20
blong 1983
OLGETA ATIKOL INSAED LONG KONSTITUSEN IA
JAPTA 1
KAONTRI IA MO PAOA BLONG RUL LONG HEM
1. Ripablik blong Vanuatu
2. Konstitusen hemi mama loa
3. Nasonal langwis mo olgeta ofisol langwis
4. Paoa blong rulum kaontri, fasin blong vot mo ol politikol pati
JAPTA 2
OL STAMBA RAET MO DIUTI
PAT 1 - Ol Stamba Raet
5. Ol stamba raet mo fridom blong wanwan man mo woman
6. Pipol i mas respektem ol stamba raet
PAT 2 - Ol Impoten Diuti
7. Ol impoten diuti
8. I no rong blong man o woman i no mekem ol impoten diuti ia be
Gavman i mas traem blong enkarejem ol pipol blong oli respektem mo
mekem ol diuti ia
JAPTA 3
OL SITISEN BLONG RIPABLIK BLONG VANUATU
9. Ol man we bambae oli kam sitisen blong Ripablik blong Vanuatu
wantaem nomo long dei blong indipendens
10. Ol man we long Dei blong Indipendens bambae oli save askem blong
kam sitisen blong Ripablik blong Vanuatu
11. Olgeta we bambae oli bon long taem we Ripablik blong Vanuatu i
indipenden finis
12. Ol narafala man we oli wantem kam sitisen blong Ripablik blong
Vanuatu
13. Sitisen blong Ripablik blong Vanuatu i no save kam sitisen blong tu
kaontri wantaem
14. Ol narafala loa long saed we man i kam sitisen
JAPTA 4
PALEMEN
15. Palemen
16. Olgeta we i gat paoa blong mekem ol loa
17. Fasin blong elektem ol memba blong Palemen
18. Elektoral Komisen
19. Prinsipol Elektoral Ofisa
20. Ol wok blong Elektoral Komisen mo Prinsipol Elektoral Ofisa
21. Fasin we Palemen bambae i wok
22. Spika mo Deputi Spika blong Palemen
23. Ol komiti
24. Ol miting blong Palemen i open long pablik
25. Ol mane blong Gavman
26. Stret fasin blong apruvum ol triti
27. Spesel raet we ol memba blong Palemen i gat
28. Taem blong wok blong Palemen
JAPTA 5
NASONAL KAONSEL BLONG OLGETA JIF
29. Nasonal Kaonsel blong olgeta Jif
30. Ol wok blong Kaonsel
31. Fasin blong stanemap Kaonsel ia mo wok blong ol jif
32. Spesel raet we ol memba blong Kaonsel ia i gat
JAPTA 6
HED BLONG KAONTRI
33. Presiden blong Ripablik
34. Eleksen blong Presiden blong Ripablik
35. Man we i save kam Presiden blong Ripablik
36. Namba blong yia we wan man bambae i holem wok olsem Presiden mo
fasin we oli save tekemaot hem long wok ia
37. Spika blong Palemen i save mekem wok blong Presiden
38. Presiden blong Ripablik i save katem daon panisman blong man
JAPTA 7
PAOA BLONG GAVMAN
39. Paoa blong mekem wok blong Gavman
40. Kaonsel blong ol Minista
41. Fasin blong elektem Praem Minista
42. Fasin blong apoentem ol Minista mo fasin blong tekemaot Minista
long wok bong hem
43. Ol Minista bambae oli folem wan tingting nomo mo vot blong no gat
tras
44. Samting we i mekem olgeta Mnista i finis long wok blong olgeta
45. Ol narafala samting we oli save mekem wan Minista i finis long wok
blong hem
46. Ol Minista oli memba blong Palemen
JAPTA 8
JASTIS
47. Ol wok blong Judiseri
48. Judisol Sevis Komisen
49. Suprim Kot, Jif Jastis mo ol narafala jaj
50. Apil agensem desisen blong Suprim Kot i go long Apil Kot
51. Fasin blong faenemaot stret ol rul blong kastom
52. Ol vilij kot mo aelan kot
53. Man we i luk se narafala man i mekem fasin long hem we i no
stret long Konstitusen ia i save putum keis blong hem long Suprim Kot
54. Ol komplen long saed blong eleksen
55. Publik Prosekuta
56. Pablik Solisita
JAPTA 9
ADMINISTREISEN
PAT 1 - Pablik Sevis
57. Olgeta pablik seven
58. Fasin blong transferem wan pablik seven mo raet blong no lusum wok
i no aplae long ol politikol advaesa
59. Ol memba blong Pablik Sevis Komisen
60. Ol wok blong Pablik Sevis Komisen
PAT 2 - Ombudsman
61. Ombudsman
62. Ol enkwaeri we Ombudsman i save mekem
63. Ol samting we Ombudsman i faenemaot mo ol ripot blong hem
64. Raet blong wan sitisen blong kasem sevis long langwis we hemi save
gud
65. Ombudsman nomo i bos blong wok blong hem
JAPTA 10
LIDASIP KOD
66. Fasin blong ol lida
67. Fasin we bambae ol lida blong kaontri oli folem
68. Palemen bambae i mekem loa from ol fasin ia
JAPTA 11
OL PAOA LONG SAED BLONG EMEJENSI
69. Ol spesel loa long saed blong emejensi
70. Period blong emejensi mo fasin blong putum bak period blong
emejensi
71. Ol samting we ol spesel loa we oli mekem long bigfala taem blong
trabol olsem oli save talem
72. Ol komplen we i go long suprim kot from ol emejensi reguleisen
JAPTA 12
GRAON
73. Graon i blong ol kastom ona
74. Fasin blong onem graon mo blong yusum graon
75. Graon we man i onem long fasing blong fri-hol taetol
76. Nasonal loa long saed blong graon
77. Kompensesen long saed blong graon
78. Ol rao from graon
79. Bisnis blong salem mo pem graon
80. Gavman i save onem graon
81. Gavman i save seremaot graon long ol man we oli sot long graon
JAPTA 13
DISENTRELAESEISEN
82. Loa blong disentrelaeseisen
83. Ol Lokol Gavman Kaonsel
84. Ol bil blong mekem amendmen long Konstitusen
85. Fasin blong wok folem blong mekem amendmen long Konstitusen
Blong mekem amendmen long Konstitusen ia, bambae ol sitisen oli mas
mekem referendom fastaem blong soemaot tingting blong olgeta
JAPTA 15
TAEM WE REPRESENTATIF ASEMBLI I FINIS MO GAVMAN BLONG
RIPABLIK BLONG VANUATU I STANAP
87. Fes Presiden Blong Ripablik
88. Fes Praem Minista mo ol fes Minista
89. Fes Palemen
90. Ol man we oli stap wok blong Gavman
91. Ol jaj blong Suprim Kot
92. Olgeta samting we Gavman blong Ripablik blong Vanuatu i gat raet
blong mekem, o i agri blong mekem o i promes blong mekem
93. Sistem blong eleksen
94. Ol keis we i stap long foret blong kot
95. Ol loa we i stap bifo Ripablik blong Vanuatu i kasem indipendens
SPESEL RUL 1 : ELEKSEN BLONG PRESIDEN BLONG
RIPABLIK
SPESEL
RUL 2 : ELEKSEN BLONG PRAEM MINISTA
-----------------------------------------
KONSTITUSEN BLONG RIPABLIK BLONG
VANUATU
YUMI olgeta man
Vanuatu,
YUMI PRAOD from yumi
bin faet strong blong kam olsem fri man,
MO YUMI TINGTING STRONG YET
blong lukaotem gud olgeta samting we yumi winim long faet ia,
MO YUMI STAP HOLEM TAIT FASIN IA
we yumi gat ol narafala kala, ol narafala langwis mo ol narafala
kastom,
BE YUMI SAVE GUD se
long fiuja bambae yumi evriwan i wokbaot long wan rod nomo,
YUMI
TALEMAOT NAO IA SE yumi stanemap Ripablik of Vanuatu we
yumi ol sitisen
blong hem yumi gat wan tingting nomo mo yumi fri man. Kaontri blong
yumi ia i stanap long ol gudfala fasin blong ol bubu blong yumi bifo,
wetem fasin blong biliv long God mo ol fasin blong kristian man,
BLONG
STANEMAP RIPABLIK BLONG YUMI IA OLSEM, yumi evri sitisen i
agri blong
stap andanit long Konstitusen ia blong hemi holem gud ol laef blong
yumi.
JAPTA 1
KAONTRI IA MO PAOA BLONG RUL LONG
HEM
RIPABLIK BLONG VANUATU
1. Ripablik blong Vanuatu hemi wan kaontri we olgeta man blong hem oli
holem paoa long Gavman mo Gavman ia nao hemi rul long hem.
KONSTITUSEN HEMI MAMA LOA
2. Konstitusen ia hemi mama loa mo hemi stamba blong ol narafala loa
blong Ripablik blong Vanuatu.
NASONAL LANGWIS MO OLGETA
OFISOL LANGWIS
3. (1) Nasonal langwis blong Ripablik blong Vanuatu hemi Bislama.
Olgeta ofisol langwis oli Bislama, Inglis mo Franis. Tufala mein
langwis blong edukeisen hemi Inglis mo Franis.
(2) Ripablik blong Vanuatu bambae i lukaotem gud ol netif langwis from
oli olsem sam long ol gudfala samting we kaontri ia i gat long bifo i
kam kasem tedei mo bambae oli save jusum wan i kam olsem nasonal
langwis.
PAOA BLONG RULUM KAONTRI,
FASIN BLONG VOT MO OL POLITIKOL PATI
4. (1) Long Vanuatu bambae ol sitisen oli holem paoa blong rulum
kaontri mo bambae oli elektem ol memba blong Palemen we bambae oli
givim paoa long olgeta blong oli rul.
(2) Sipos Palemen i no mekem loa
blong blokem samfala man, olgeta sitisen we oli gat 18 yia o moa bambae
oli gat raet blong vot. Bambae olgeta evriwan oli gat sem raet blong
vot mo taem oli vot bambae oli gat raet blong mekem long wan fasin we
narafala man i no save tingting blong narafala man.
(3) Olgeta sitisen
bambae oli gat raet blong stanemap ol politikol pati mo ol pati ia oli
gat raet blong putum ol kandidet long taem blong eleksen. Bambae ol
pati ia oli respektem oltaem Konstitusen ia mo ol stamba tingting blong
demokrasi.
JAPTA 2
OL STAMBA RAET MO DIUTI
PAT 1 - Ol stamba raet
OL STAMBA RAET MO FRIDOM
BLONG WANWAN MAN MO WOMAN
5. (1) Ripablik blong Vanuatu hemi luksave se, sipos i no gat eni tabu
we loa i putum long ol pipol blong narafala kaontri, evri man mo woman
oli gat ol stamba raet mo fridom we oli stap andanit ia wetaot eni
diskrimineisen o rabis tingting agensem olgeta from kala blong skin
blong olgeta, from kaontri we oli kamaot long hem, from rilijes mo
kastom bilif blong olgeta, from tingting blong olgeta long saed blong
politik, from langwis blong olgeta o from hemi wan man o wan woman be
evriwan i mas tingting hevi mo respektem ol raet mo fridom blong
narafala man mo intres blong pablik long saed blong difens, sefti,
pablik oda, welfea mo helt:
(a) laef;
(b) fridom;
(c) sekuriti blong wanwan man;
(d) proteksen long saed blong loa;
(e) fri long eni nogud tritmen mo fasin blong fosem man blong wok;
(f) fridom blong talem tingting blong hem mo blong wosip;
(g) fridom blong talem tingting blong hem;
(h) fridom blong kam tugeta mo mit;
(i) fridom blong muv olbaot;
(j) raet blong gat wan praevet laef long hom mo proteksen long propeti
mo blong man i no blokem blong narafala man blong enjoyem propeti we
hemi gat raet long hem;
(k) ikwel tritmen folem loa o administretiv fasin blong wok, be hemia
nomo se i no gat wan loa bambae i go agensem paragraf ia be bambae i
setemaot sam rul we blong oli kavremap spesel benefit, welfea,
proteksen o developdevelopmen blong ol woman, ol pikinini mo ol yang
pipol, ol memba blong ol grup we laef i no isi tumas blong olgeta mo
olgeta pipol we oli stap liv long ol eria we i no develop i kam andap
tumas.
(2) Loa bambae i protekem olgeta samting ia:
(a) Eni man o woman we oli
talem se hemi mekem wan samting i rong
bambae hemi mas pas long kot kwiktaem be kot i mas wok indipenden mo no
sapotem wan saed mo bambae man o woman ia i gat wan loea blong difendem
hem sipos hemi wan bigfala rong;
(b) Pablik i mas stanap long tingting se man o woman we oli talem se
hemi mekem rong hemi no brekem loa go kasem taem we wan kot nomo i
talem se i tru hemi bin brekem loa;
(c) Eni man o woman we oli talem se hemi mekem wan samting i rong
bambae oli mas talemaot kwiktaem long hem long langwis we hemi
haremsave wanem rong nao kot i stap faenem se hemi mekem;
(d) Sipos man o woman we oli talem se hemi mekem wan samting i rong i
no haremsave langwis we oli stap yusum long kot haus blong jasem rong
blong hem, bambae oli mas mekem sua se i gat wan man o woman we i save
tanem langwis i stap wetem hem blong givhan long hem;
(e) Kot bambae i no gat raet blong lukluk long keis blong wan man o
woman sipos man o woman ia i no stap long kot haus long taem ia. Kot i
save lukluk long hem nomo sipos man o woman ia i talem se hemi olraet
blong kot i lukluk long keis blong hem;
(f) Kot bambae i no save jasem wan man o woman from wan samting we hemi
mekem o hemi no mekem be semtaem aksen blong hemia i no olsem wan rong
we i agensem loa we oli raetem o kastom loa long taem we man o woman ia
i mekem o i no mekem samting ia;
(g) Kot bambae i no save givim panisman long wan man o woman i ova long
limit we i stap long loa long taem we rong ia i tekemples;
(h) Kot bambae i no save lukluk bakegen long wan semak keis blong wan
man o woman o long eni narafala rong we hemi save kasem panisman from
sipos man o woman ia oli bin padonem hem; o jasem mo talem se hemi rong
o kot i talem se i no gat eni rong agensem hem.
PIPOL I MAS RESPEKTEM OL
STAMBA RAET
6. (1) Eni man o woman we i luk o i ting se wan narafala man o woman i
stap stopem hem o i stap traem blong stopem hem o i bin stopem hem long
ol raet we hemi gat folem Konstitusen, hemi save askem long Suprim Kot
blong mekem wan desisen blong hemi kasem bak ol raet blong hem ia,
hemia nomo sipos hemi no bin traem fastaem finis blong fiksim problem
ia long wan narafala fasin blong loa.
(2) Suprim Kot i save givim oda o koman long pepa mo mekem eni desisen,
we i kavremap tu saed blong kompenseisen, sipos hemi luk se hemi stret
blong givim bak raet blong man o woman ia.
PAT 2 - Ol impoten diuti
OL IMPOTEN DIUTI
7. Wanwan man mo woman i gat ol impoten diuti ia blong mekem long
hemwan mo long ol famli laen blong hem mo long ol narafala man mo
woman.
(a) blong respektem mo wok
oltaem folem ol stampa tingting blong
Konstitusen;
(b) blong luksave se hemi save developem fulwan ol save
blong hem mo mekem ol mein intres blong hem i kam andap nomo sipos hemi
tekempat fulwan long developmen blong nasonal komuniti;
(c) blong wok
oltaem folem ol raet we Konstitusen i givim long hem mo yusum ol janis
we hemi gat folem Konstitusen blong tekem pat fulwan long ol wok blong
Gavman blong Ripablik blong Vanuatu;
(d) blong protektem Ripablik blong
Vanuatu mo blong lukaotem gud ol rij samting, ol risos mo envaeronmen
blong kaontri ia blong oli save givhan long ol pipol blong kaontri we
oli laef tedei mo olgeta jenereisen we bambae oli kam yet;
(e) blong
yusum save blong hem blong mekem ol wok we bambae i helpem hemwan mo
komuniti mo, sipos i nid, hemi mas traem evri wei blong fainem kaen wok
olsem ia;
(f) blong respektem raet mo fridom blong ol narafala pipol mo
blong wok tugeta moa wetem ol narafala pipol blong mekem se oli no
dipen tumas long narafala man mo blong mekem tu se i gat spirit blong
uniti i stap long medel blong olgeta oltaem;
(g) Blong givim, folem loa, hamas hemi save givim blong mekem se i gat
ol revenu we bambae Gavman i nidim blong developem Ripablik blong
Vanuatu mo blong winim ol stampa tingting we hemi wok had from;
(h) long saed blong ol papa mo mama, tufala i mas sapotem, helpem mo
tijim ol pikinini blong tufala, nomata sipos oli bon insaed o aotsaed
long maret, mo blong mekem sua se ol pikinini ia oli save gud ol stamba
raet mo diuti blong olgeta mo ol stampa tingting we Gavman i stap traem
blong winim mo ol kalja mo kastom blong ol pipol blong Vanuatu;
(i) long saed blong ol pikinini, oli mas respektem ol papa mo mama
blong olgeta oltaem.
I NO RONG BLONG MAN O
WOMAN I NO MEKEM OL IMPOTEN DIUTI IA BE GAVMAN I
MAS TRAEM BLONG ENKAREJEM OL PIPOL OLI RESPEKTEM MO MEKEM DIUTI IA
8.
Sipos i no gat wan loa i setemaot eni narafala rul, bambae i no minim
se wan man o woman i brekem loa sipos hemi no mekem ol impoten diuti
ia. Be nomata long hemia, hemi diuti blong evri Gavman blong yusum ol
paoa we oli gat blong enkarejem olgeta pipol blong respektem mo mekem
ol diuti ia.
JAPTA 3
OL SITISEN BLONG RIPABLIK
BLONG VANUATU
OL MAN WE BAMBAE OLI KAM SITISEN BLONG RIPABLIK BLONG VANUATU WANTAEM
NOMO LONG DEI BLONG INDIPENDENS
9. Long dei we Ripablik blong Vanuatu bambae i kam indipenden, olgeta
man ia nao bambae oli kam olsem sitisen blong Ripablik blong Vanuatu
wantaem nomo:
(a) Olgeta we ol fo stret
bubu blong olgeta oli stret netif blong
Ripablik blong Vanuatu, olgeta ia wantaem nomo bambae oli gat raet
blong karem nem olsem.
(b) Olgeta we wan long ol olfala blong olgeta bifo i stret netif blong
Ripablik blong Vanuatu, mo oli no sitisen blong narafala kaontri mo oli
no stap aninit long flag blong narafala kaontri, olgeta ia tu, wantaem
nomo bambae oli gat raet blong karem nem olsem.
OL MAN WE LONG DEI BLONG
INDIPENDENS BAMBAE OLI SAVE ASKEM BLONG KAM
SITISEN BLONG RIPABLIK BLONG VANUATU
10. Long dei we Ripablik blong Vanuatu bambae i kam indipenden, olgeta
we wan olfala blong olgeta bifo i stret netif blong Ripablik blong
Vanuatu, be oli sitisen blong narafala kaontri mo oli stap aninit long
flag blong narafala kaontri, sipos olgeta olsem oli wantem kam sitisen
blong Ripablik blong Vanuatu, bambae oli save askem o papa mo mama o
eni narafala man we i stap lukaotem olgeta i askem long Gavman blong
kam sitisen. Olgeta man olsem bambae oli gat tri manis afta long dei ia
blong indipenden, sipos no bambae hemi moa long tri manis sipos Palemen
i apruvum long wan loa, blong oli askem long Gavman blong kam sitisen.
Sipos Gavman i agri blong givim sitisen long wan man olsem, man ia i
mas tekemaot nem blong hem long narafala kaontri blong hem ia. Bambae
Gavman i givim tri manis long man olsem, sipos no moa long tri manis
sipos Palemen i apruvum long wan loa, blong man olsem i tekemaot nem
blong hem long narafala kaontri blong hem ia. Be sipos man ia i no
mekem olsem, bambae hem i lusum taetol blong hem ia olsem sitisen blong
Ripablik blong Vanuatu. Long saed blong wan pikinini we yia blong hem i
no kasem 18 yet, bambae hemi lusum taetol blong hem olsem sitisen blong
Ripablik blong Vanuatu 3 manis afta we hemi kasem 18 yia sipos hemi no
tekemaot nem blong hem long narafala kaontri blong hem ia.
OLGETA WE BAMBAE OLI BON
LONG TAEM WE RIPABLIK BLONG VANUATU I
INDIPENDEN FINIS
11. Olgeta we bambae oli bon long taem we Ripablik blong Vanuatu i
indipenden finis, i nating we oli bon long Ripablik blong Vanuatu no
long ovasi, be sipos papa mo mama blong olgeta i sitisen blong Ripablik
blong Vanuatu bambae olgeta oli sitisen blong Ripablik blong Vanuatu.
OL NARAFALA MAN WE OLI
WANTEM KAM SITISEN BLONG RIPABLIK BLONG VANUATU
12. Sipos wan man we i sitisen blong narafala kaontri o we i no gat
kaontri blong hem, be hem i stap ten yia finis long Ripablik blong
Vanuatu o moa long ten yia, mo hem i wantem kam sitisen blong Ripablik
blong Vanuatu, bambae hem i save askem long Gavman blong i kam sitisen.
Palemen bambae i save mekem sam narafala loa o rul bakegen blong hemi
kavremap saed blong ol man we oli wantem kam sitisen blong Ripablik
blong Vanuatu long fasin ia, mo bambae hem i save putum ol man blong
oli lukluk long ol aplikeisen blong askem sitisen mo disaed long
olgeta.
SITISEN BLONG RIPABLIK
BLONG VANUATU I NO SAVE KAM SITISEN BLONG TU
KAONTRI WANTAEM
13. Ripablik blong Vanuatu bambae i no save letem ol
sitisen blong hem blong oli stap andanit long tu flag. Eni sitisen
blong Ripablik blong Vanuatu we hemi sitisen blong wan narafala kaontri
finis o we i kam sitisen blong wan narafala kaontri bambae i lusum raet
blong hem olsem wan sitisen blong Vanuatu. Be bambae hemi no save lusum
taetol blong hem olsem sitisen blong Ripablik blong Vanuatu sipos
insaed long period blong 3 manis, o long wan taem we i moa longfala
sipos Palemen i disaed long hem, we hemi kasem raet olsem sitisen blong
Vanuatu o blong narafala kaontri ia hemi tekemaot nem blong hem long
narafala kaontri ia blong hem.
Long saed blong wan pikinini we i no kasem 18 yia yet bambae Gavman i
givim 3 manis long hem afta we hemi kasem 18 yia blong i tekemaot nem
blong hem long narafala kaontri ia blong hem mo kipim wan raet nomo
olsem sitisen blong Ripablik blong Vanuatu.
OL NARAFALA LOA LONG SAED
WE MAN I KAM SITISEN
14. Bambae Palemen i save mekem sam moa loa bakegen long
saed blong ol man we ol Atikol insaed long Japta ia i no kavremap
olgeta blong oli save kam sitisen blong Ripablik blong Vanuatu. Bambae
hem i save mekem tu ol loa blong tekemaot raet blong man blong karem
raet olsem sitisen blong Ripablik blong Vanuatu mo blong letem man i
tekemaot nem blong hem se hem bambae i no moa kipim raet ia.
JAPTA 4
PALEMEN
PALEMEN
15. Ol pipol we ol sitisen bambae oli jusumaot olgeta blong mekem wok
blong Gavman bambae oli stap long wan bodi nomo blong mekem ol wok ia
mo bambae yumi singaotem bodi ia olsem Palemen.
OLGETA WE I GAT PAOA
BLONG MEKEM OL LOA
16. (1) Palemen ia bambae i save mekem ol loa blong mekem se i gat pis
mo oda mo blong mekem wok blong Gavman i gohed gud.
(2) Fasin we Palemen bambae i mekem ol loa, bambae Praem Minista, no
wan long ol Minista, no wan o moa long wan Memba blong Palemen i putum
bil mo Palemen bambae i vot long hem, mo sipos i apruvum bil ia bambae
hemi save kam loa.
(3) Sipos Palemen i agri finis long wan bil olsem bambae bil ia i mas
go long Presiden blong Ripablik blong hemi saenem mo stampem bifo 2 wik
i pas blong soemaot se bil ia i kam loa blong Ripablik blong Vanuatu.
(4) Sipos Presiden i luk se wan bil blong Palemen i no stret long
Konstitusen ia, bambae hemi save askem long Suprim Kot blong i jekemap
mo talemaot tingting blong hem long Presiden. Sipos Suprim Kot i talem
bil blong Palemen ia i no stret long Konstitusen, bambae Presiden blong
Ripablik i no save saenem mo stampem.
FASIN BLONG ELEKTEM OL
MEMBA BLONG PALEMEN
17. (1) Palemen bambae i gat ol memba blong hem we ol sitisen oli
elektem olgeta folem raet we oli gat blong vot long wan pablik eleksen
mo fasin blong mekem eleksen bambae i letem se namba blong ol pati we
oli holem jea bambae i folem namba blong ol sitisen we oli vot from ol
pati ia. Nao long fasin ia, olgeta grup blong politik mo ol man we oli
gat ol narafala tingting bambae oli save gat ol memba we oli
ripresentem olgeta long Palemen.
(2) Sipos Palemen i no mekem loa blong blokem samfala man,
olgetasitisen blong Ripablik blong Vanuatu we oli gat twenti faef yia o
moa bambae oli gat raet blong kam kandidet long eleksen blong Palemen.
ELEKTORAL KOMISEN
18. (1) Bambae i gat wan Elektoral Komisen we insaed i gat wan Jeaman
wetem tu memba we bambae Presiden blong Ripablik i apoentem olgeta
folem advaes we hemi kasem long Judisol Sevis Komisen.
(2) Olgeta man
ia bambae oli no save holem wok olsem Jeaman o memba insaed long
Komisen ia:
(a) wan memba o wan
kandidet blong eleksen blong Palemen;
(b) wan memba o wan kandidet blong eleksen blong lokol gavman o
munisipol eleksen;
(c) wan memba o wan kandidet blong eleksen blong Nasonal Kaonsel blong
ol Jif;
(d) eni man we i holem wan hae posisen insaed long wan politikol pati.
(3) Wan Jeaman o wan memba blong Komisen bambae i finis blong holem wok
insaed long Komisen ia :
(a) afta 5 yia we oli
apaoentem hem blong holem wok ia;
(b) sipos long eni taem, sipos hemi no bin memba blong Komisen, i gat
wan samting i hapen we i save blokem hem blong holem kaen wok olsem ia.
PRINSIPOL ELEKTORAL OFISA
19. Bambae i gat wan Prinsipol Elektoral Ofisa we hemi holem wok olsem
wan pablik seven.
OL WOK BLONG ELEKTORAL
KOMISEN MO PRINSIPOL ELEKTORAL OFISA
20. (1) Elektoral Komisen bambae i lukaot long ol wok blong rejistarem
ol man we bambae oli save vot mo bambae hemi lukaotem long olsem wanem
oli ranem ol eleksen blong ol memba Palemen, ol memba blong Nasonal
Kaonsel blong olgeta Jif, mo ol memba blong ol lokol gavman mo
munisipol kaonsel. Komisen bambae i gat paoa mo wok long saed blong
rejistarem ol man blong vot mo long saed blong eleksen olsem we Palemen
i talem.
(2) Prinsipol Elektoral Ofisa hemi gat paoa mo wok long saed blong
rejistarem ol man blong vot mo long saed blong eleksen olsem we Palemen
i talem. Prinsipol Elektoral Ofisa hemi mas sendem infomeisen i go long
Komisen olgeta blong oli save abaot ol wok blong hem mo bambae hemi gat
raet blong sidaon long ol miting blong Komisen mo bambae hemi folem
wanem kaen toktok o advaes we Komisen i givim long hem long saed blong
ol wok blong hem.
(3) Sipos i gat wan bil, wan reguleisen o wan narafala kaen loa blong
Palemen i jenisem loa blong rejistarem ol man we bambae oli vot o loa
blong fasin blong eleksen blong jusumaot ol memba blong Palemen,
Nasonal Kaonsel blong ol Jif, ol lokol gavman mo munisipol kaonsel ol
bil olsem bambae i mas pas long Elektoral Komisen blong hemi save
talemaot tingting blong hem fastaem bifo hemi save go long Palemen
blong oli lukluk long hem.
(4) Elektoral Komisen i save sabmitim ol ripot i go long Palemen long
saed blong wok we oli putum long han blong hem o eni bil o wan pepa
long saed blong loa we hemi raetem long saed blong ol wok blong hem
sipos hemi luk se i gat nid long hem.
FASIN WE PALEMEN BAMBAE I
WOK
21. (1) Palemen bambae i gat tu odinari miting long wan yia.
(2) Palemen bambae i save mekem ol ekstra odinari miting tu sipos
majoriti blong ol Memba, Spika o Praem Minista i askem.
(3) Sipos Konstitusen i no jenisem fasin blong vot, oltaem ol memba
blong Palemen bambae oli vot long fasin we ol man oli save luk mo
desisen bambae i go long simpol majoriti blong ol memba we oli vot.
(4) Sipos Konstitusen i no jenisem namba blong wan kworom, tu ted blong
ol memba insaed long Palemen bambae oli fomem kworom mo miting i save
gohed. Sipos i no gat namba we inaf blong mekemap kworom long fes dei
blong miting bambae miting i jes tekemples 3 dei afta nomo, mo long
taem ia bambae wan simpol majoriti nomo i save fomem kworom.
(5) Palemen nomo bambae i mekem ol rul we bambae i folem blong mekem ol
wok blong hem.
SPIKA MO DEPUTI SPIKA
BLONG PALEMEN
22. (1) Afta eni
jenerol eleksen Palemen bambae i jusumaot wan Spika mo wan o moa Deputi
Spika blong hem long fas dei blong fes miting blong hem.
(2) Spika bambae i tekem jea long evri miting blong Palemen mo bambae i
wok blong hem blong mekem ol miting i ron stret.
(3) Be sipos Spika ia i no stap bambae Deputi Spika i save mekem olgeta
wok blong Spika.
OL KOMITI
23. Palemen bambae i save stanemap ol Komiti blong hem mo bambae i save
jusum ol memba blong olgeta.
OL MITING BLONG PALEMEN I
OPEN LONG PABLIK
24. Oltaem ol miting blong Palemen bambae i open long olgeta man blong
oli save go lesin. Be sipos Palemen i wantem mekem miting long narafala
fasin, bambae i save mekem.
OL MANE BLONG GAVMAN
25. (1) Evri yia Gavman bambae hemi putum wan bil blong badjet blong
Palemen i apruvum.
(2) I no gat wan man i gat raet blong putum takis, blong jenisim takis,
o blong letem ol man we oli stap wok long Gavman blong oli yusum mane
be Palemen nomo bambae hemia tru long ol loa we bambae hemi mekem.
(3) Palemen bambae i no save tokbaot eni mosen blong putum takis, blong
leftemap takis, o long saed blong spendem pablik mane sipos Gavman i no
agri long hem.
(4) Palemen bambae i stanemap wan ofis blong Odita
Jenerol we bambae Pablik Sevis Komisen nao i jusum mo putum wan man
blong i holem wok insaed.
(5) Wok blong Odita Jenerol bambae hemi stap jekemap ol ripot blong ol
mane we ol man we oli stap wok blong Gavman blong Ripablik blong
Vanuatu oli spendem, mo bambae i sendem ripot blong hem ia i go long
Palemen mo long Gavman.
(6) Sipos Odita Jenerol ia i stap mekem wok blong hem bambae i no gat
narafala man i save tok long hem from o i save kam bos blong hem be
hemwan nomo bambae i bos long wok we i stap long han blong hem.
STRET
FASIN BLONG APRUVUM OL TRITI
26. Sipos Gavman blong Ripablik blong Vanuatu i stap toktok wetem
Gavman blong narafala kaontri long saed blong wan triti, bambae hemi
mas putum triti ia i kam long Palemen blong Palemen i apruvum sipos:
(a) triti ia i kavremap ol
intanasonal oganaeseisen, pis o tred;
(b) triti i mekem se oli mas spendem sam mane blong Gavman;
(c) triti olsem i jenisem laef blong ol man long Ripablik blong Vanuatu
long sam wei;
(d) Sipos promes olsem i min se palemen i mas jenisim samfala loa
fastaem blong mekem promes i wok;
(e) triti olsem i seftem mak blong graon we i blong Ripablik blong
Vanuatu, olsem we i tekemaot sam graon, nao i joenem sam moa graon
bakegen, o i jenjenisem graon wetem narafala kaontri.
SPESEL RAET WE OL
MEMBA BLONG PALEMEN I GAT
27. (1) Sipos memba blong Palemen i sakem sam strong tok insaed long
Palemen o i mekem vot we i agens long narafala man, bambae polis i no
save holem hem from mo i no save putum hem long kalabus, mo narafala
man tu bambae i no save tekem hem i go long kot.
(2) Sipos memba blong Palemen i gat wan trabol bambae polis i no save
holem hem long taem blong miting blong Palemen. Bambae polis i save
holem hem nomo sipos Palemen i talem, be bambae hemia from samfala poen
nomo we Palemen i luk se polis i mas tekemaot hem from.
TAEM BLONG WOK BLONG
PALEMEN
28. (1) Palemen bambae i stanap blong mekem wok blong hem blong 4 yia
sipos oli no disolvem fastaem olsem paragraf (2) mo paragraf (3) daon i
talem.
(2) Palemen i save disaed se bambae hemi disolv sipos majoriti blong ol
memba we oli stap long wan spesel miting we i gat moa long tri kwota
blong ol memba oli stap long hem oli agri se bambae Palemen i disolv.
Be Spika i mas kasem notis blong mosen ia 1 wik o moa bifo dei we
bambae oli toktok mo vot long mosen ia.
(3) Folem advaes we hemi kasem
long Kaonsel blong ol Minista, Presiden blong Ripablik i save disaed se
Palemen i disolv.
(4) Sipos Palemen i disolv, bambae i mas gat jenerol
eleksen bakegen be eleksen ia i no save tekemples bifo 30 dei i pas
afta we Palemen i disolv mo i no save stap longtaem go bitim siksti dei
afta we Palemen i disolv.
(5) Sipos Palemen i disolv folem paragraf (2) o paragraf (3) afta i gat
eleksen bakegen, bambae oli save disolvem niufala Palemen ia bifo 12
manis i pas afta long jenerol eleksen blong hem.
JAPTA 5
NASONAL KAONSEL BLONG
OLGETA JIF
NASONAL KAONSEL BLONG
OLGETA JIF
29. (1) Nasonal Kaonsel blong olgeta
Jif, ol Distrik Kaonsel blong olgeta Jif bambae oli jusumaot ol kastom
jif blong oli sidaon insaed long Nasonal Kaonsel ia.
(2) Kaonsel ia nomo bambae i mekem ol rul we bambae i folem blong mekem
ol wok blong hem.
(3) Kaonsel ia bambae i mekem miting wan taem long wan yia. Be hemi
save gat moa sipos Gavman, Palemen, o Kaonsel ia nomo i wantem.
(4) Long fes miting blong hem folem eleksen blong hem bambae ol memba
blong Kaonsel ia oli jusumaot Presiden blong Kaonsel.
OL WOK BLONG
KAONSEL
30. (1) Nasonal Kaonsel blong olgeta Jif ia i gat paoa blong tokabaot
olgeta bisnis blong kastom mo tradisen mo hemi save rekomendem sam rod
o wei we yumi save folem blong lukaotem gud mo promotem kalja mo ol
langwis blong ol man Vanuatu.
(2) Kaonsel bambae i save givim tingting o advaes blong hem long saed
blong eni samting, espeseli long saed blong kastom mo tredisen sipos
wan bil we bambae i go long Palemen blong hemi tokbaot hemi tajem saed
ia.
FASIN BLONG STANEMAP
KAONSEL IA MO WOK BLONG OL JIF
31. Palemen
bambae i mekem loa blong mekem rod blong stanemap Nasonal Kaonsel blong
olgeta Jif mo blong mekem ol wok blong hem mo espeseli long saed blong
ol wok we ol jif bambae oli mekem long vilij, long aelan mo long
distrik.
SPESEL RAET WE OL MEMBA
BLONG KAONSEL IA I GAT
32. (1) Sipos memba blong Nasonal Kaonsel blong ol Jif i sakem sam
strong tok insaed long Kaonsel o i mekem vot we i agens long narafala
man, bambae polis i no save holem hem from mo i no save putum hem long
kalabus, mo narafala man tu bambae i no save tekem hem i go long kot.
(2) Sipos memba blong Kaonsel i gat wan trabol bambae polis i no save
holem hem long taem blong miting blong Kaonsel o blong wan long ol
komiti blong hem. Bambae polis i save holem hem nomo sipos Palemen i
talem, be bambae hemia from samfala poen nomo we Palemen i luk se polis
i mas tekemaot hem from.
JAPTA 6
HED BLONG KAONTRI
PRESIDEN BLONG RIPABLIK
33. Hed blong Ripablik blong Vanuatu bambae nem blong hem hemi Presiden
blong Ripablik, mo bambae hemi saen blong uniti long kaontri ia.
ELEKSEN BLONG PRESIDEN
BLONG RIPABLIK
34. (1) Folem Spesel Rul 1 we i stap long en blong Konstitusen ia,
Elektoral Kolej we ol memba blong Palemen mo ol Presiden blong ol Lokol
Gavman Kaonsel oli mekemap bambae oli elektem Presiden blong Ripablik
long fasin blong sikret vot.
(2) Taem i no gat wan man i holem wok
olsem Presiden blong Ripablik, bambae oli mas elektem wan niu man blong
fulmap ofis ia bifo tri wik i pas afta we hemi empti, o sipos i hapen
be Palemen i disolv long sem taem, bambae oli mas elektem nekis man
bifo tri wik i pas afta we fes miting blong niufala Palemen i
tekemples.
MAN WE I SAVE KAM
PRESIDEN BLONG RIPABLIK
35. Elektoral Kolej i save jusum eni netif blong Ripablik blong Vanuatu
we i stret blong ol man oli elektem hem blong i kam memba blong Palemen
blong i kam Presiden blong.
NAMBA BLONG YIA WE WAN
MAN BAMBAE I HOLEM WOK OLSEM PRESIDEN MO FASIN
WE OLI SAVE TEKEMAOT HEM LONG WOK IA
36. (1) Wan man i save holem wok olsem Presiden blong faef yia.
(2) Elektoral Kolej we oli setemap folem Atikol 34 bambae i elektem wan
Presiden blong Ripablik folem wan mosen we wan ted blong ol memba blong
Kolej ia oli saenem mo tu ted blong ol memba blong hem oli apruvum taem
ova long tri kwota blong ol memba blong hem, i minim se i mas gat moa
long tri ted blong ol Presiden blong ol Lokol Gavman Kaonsel oli stap
long taem ia.
(3) Notis blong mosen we sab-atikol (2) andap i tokbaot i mas kasem
Spika 2 wik o moa bifo oli miting blong toktok long hem.
(4) Sipos long
fas miting blong Kolej i no gat kworom olsem sab-atikol (2) antap i
talem, Kolej ia bambae i save mekem miting bakegen afta wan wik i pas
blong vot long mosen ia we sab-atikol (2) antap i tokbaot, nating sipos
i gat wan kworom blong tu ted blong ol memba blong Kolej nomo oli stap
long taem ia.
SPIKA BLONG PALEMEN I
SAVE MEKEM WOK BLONG PRESIDEN
37. Sipos samtaem i no gat Presiden blong Ripablik, o hemi stap ovasi o
hemi no strong blong mekem wok blong hem, bambae Spika blong Palemen i
mekem ol wok blong Presiden folem Konstitusen ia mo ol narafala loa
bakegen.
PRESIDEN BLONG RIPABLIK I
SAVE KATEM DAON PANISMAN BLONG MAN
38. Presiden blong Ripalik bambae i save sore long man we kot i putum
hem long kalabus mo jenisem o daonem panisman blong hem o save letem i
go fri. Palemen i save setemap wan komiti blong i givhan long Presiden
blong mekem wok ia.
JAPTA 7
PAOA BLONG GAVMAN
PAOA BLONG MEKEM WOK
BLONG GAVMAN
39. (1) Olgeta pipol blong Ripablik blong Vanuatu i holem paoa blong
Gavman, be olgeta i givim paoa blong mekem wok blong Gavman long Praem
Minista wetem Kaonsel blong ol Minista, mo olgeta ia bambae oli mekem
wok blong Gavman olsem we Konstitusen wetem ol narafala loa i talem.
(2) Oltaem Praem Minista bambae i stap givim ripot long ol wok blong
Gavman blong Vanuatu long Presiden blong Ripablik blong hem i save gud
ol wok blong Gavman we i stap gohed.
(3) Sipos Presiden blong Ripablik i luk se wan reguleisen i no stret
long Konstitusen ia bambae hemi save sendem reguleisen ia i go long
Suprim Kot blong i jekem nao i talemaot tingting blong hem long
Presiden.
KAONSEL BLONG OL MINISTA
40. (1) Bambae i gat wan Kaonsel blong ol Minista we ol memba blong hem
bambae i gat Praem Minista wetem olgeta Minista blong Gavman.
(2) Namba blong ol Minista wetem Praem Minista bambae i no bitim wan
kwota blong totol namba blong evri memba blong Palemen.
FASIN BLONG
ELEKTEM PRAEM MINISTA
41. Folem Spesel Rul 2 we i stap long en blong Konstitusen ia, Palemen
bambae i elektem wan memba blong hem i kam Praem Minista long fasin
blong sikret vot.
FASIN BLONG APOENTEM OL
MINISTA MO FASIN BLONG
TEKEMAOT MINISTA LONG WOK BONG HEM
42. (1) Praem Minista bambae i jusum sam memba blong Palemen blong oli
kam Minista mo bambae hemi save jusum wan long ol Minista ia blong i
kam Deputi Praem Minista.
(2) Praem Minista bambae i seraot ol wok blong Gavman i go long han
blong ol Minista blong oli lukaot long ol wok ia.
(3) Sipos Praem Minista i wantem tekemaot wan Minista long wok blong
hem bakegen bambae hemi save mekem.
OL MINISTA BAMBAE OLI
FOLEM WAN TINGTING NOMO MO VOT BLONG NOGAT TRAS
43. (1) Long lukluk blong Palemen olgeta Minista oli olsem wan man nomo
mo bambae oli gat wan tingting nomo long ol wok blong olgeta.
(2) Palemen bambae i save pasem mosen blong nogat trast agensem Praem
Minista. Wan notis long saed blong wan mosen blong nogat tras i mas
kasem Spika 1 wik o moa mo wan sikis blong olgeta memba blong Palemen
oli mas saenem. Sipos bigfala majoriti blong ol memba oli sapotem mosen
ia, bambae Praem Minista wetem ol Minista oli finis long wok stret long
dei ia, be bambae oli gohed blong stap long ofis blong olgeta go kasem
taem we Palemen i elektem wan niufala Praem Minista bakegen.
SAMTING WE
I MEKEM OLGETA MINISTA I FINIS LONG WOK BLONG OLGETA
44. Sipos Praem Minista i risaen o i ded, Kaonsel blong ol Minista
bambae i finis mo olgeta Minista oli no moa save yusum nem ia Minista,
be bambae oli holem wok blong olgeta gogo kasem we Palemen i elektem
wan niufala Praem Minista bakegen. Sipos Praem Minista i ded, Deputi
Praem Minista bambae i tekem ples blong hem. Be sipos i no gat wan
Deputi Praem Minista, Presiden blong Ripablik bambae i apoentem wan
Minista blong hemi stap mekem wok blong Praem Minista go kasem taem we
Palemen i elektem wan niufala Praem Minista bakegen.
OL NARAFALA
SAMTING WE OLI SAVE MEKEM WAN MINISTA I FINIS LONG WOK BLONG HEM
45. Wan Minista, hemia i minim Praem Minista tu, oli mas finis long wok
blong olgeta:
(a) Sipos, afta long wan jenerol eleksen, Palemen i mit blong elektem
wan niufala Praem Minista;
(b) Sipos hemi finis olsem wan memba blong Palemen folem wan risen we i
difren long saed we Palemen hemi disolv;
(c) Sipos oli elektem i kam Presiden blong Ripablik o Spika blong
Palemen.
OL MINISTA OLI MEMBA
BLONG PALEMEN
46. Ol memba blong Palemen we oli apoentem olgeta oli kam Minista
bambae oli no lusum taetol blong olgeta olsem ol memba blong Palemen.
JAPTA 8
JASTIS
OL WOK BLONG JUDISERI
47. (1) Olgeta administreisen wok blong jastis bambae i stap long han
blong judiseri we bambae hemi mekem ol wok blong hem folem Konstitusen
ia wetem ol loa blong Ripablik blong Vanuatu. Hemi wok blong judiseri
blong jajem ol rong long fasin we loa ia i talem. Sipos i no gat wan
loa we i kavremap rong we judiseri i stap dil wetem, wan kot i save
mekem wan desisen long rong ia long fasin we ol man oli luk se i stret
gud mo evri taem i posibol bambae jaj i save folem loa blong kastom
blong jajem rong olsem.
(2) Presiden blong Ripablik bambae i putumap olgeta jaj be i no Jif
Jastis insaed long judiseri folem advaes we hemi kasem long Judisol
Sevis Komisen.
(3) Olgeta memba blong judiseri oli holem wok long ofis go kasem taem
we oli kasem yia blong ritae. Presiden blong Ripablik nomo i save
putumaot eni memba blong judiseri folem olgeta risen ia:
(a) Sipos kot i fainem se
jaj ia i mekem wan kriminal rong mo i panisem
hem; o
(b) Sipos Judisol Sevis Komisen i fainem se hemi mekem wan
bigfala rong, o hemi no save mekem wok blong hem o hemi no moa wok gud.
(4) Presiden blong Ripablik nomo i save promotem mo transferem ol memba
blong judiseri folem advaes we hemi kasem long Judisol Sevis Komisen.
(5) Palemen i save givim raet long Presiden blong Ripablik blong hemi
apoentem ol akting jaj hemia folem advaes blong Judisol Sevis Komisen
be bambae ol akting jaj ia oli holem wok long wan period we bambae oli
raetem i stap long leta blong apoenmen blong olgeta.
(6) Olgeta rul we i stap insaed long sab-atikol (3) long saed blong
putumaot ol jaj we oli stap insaed long judiseri bambae oli kavremap
olgeta akting jaj tu.
JUDISOL SEVIS KOMISEN
48. (1) Judisol Sevis Komisen Bambae i gat wan Jeaman blong hem we hemi
Minista we i lukaot long justis, mo bambae i gat Jif Jastis, Jeaman
blong Pablik Sevis Komisen, mo wan representativ blong Nasonal Kaonsel
blong olgeta Jif we Kaonsel i apoentem hem.
(2) Bambae i no gat wan narafala man o grup i save daerektem o
kontrolem ol wok blong Judisol Sevis Komisen.
SUPRIM KOT, JIF JASTIS MO
OL NARAFALA JAJ
49. (1) Suprim Kot bambae i bigfala paoa blong harem mo
disaed long eni sivil o kriminal keis, mo bambae i gat ol narafala paoa
we Konstitusen ia o eni loa i save givim long hem.
(2) Insaed long Suprim Kot bambae i gat Jif Jastis wetem tri narafala
jaj bakegen.
(3) Presiden blong Ripablik nomo bambae i apoentem Jif Jastis afta we
hemi toktok wetem Praem Minista mo Lida blong Oposisen.
(4) Ol man we oli kasem kwalifikeisen blong kam loea mo wok olsem wan
loea long Ripablik blong Vanuatu bambae hemi save kam Jif Jastis o kam
wan jaj long Suprim Kot.
APIL AGENSEM DESISEN
BLONG SUPRIM KOT I GO LONG APIL KOT
50. Palemen i
save mekem sam rul blong eni man we i pas long Suprim Kot mo i no glad
long fes desisen blong hem bambae hemi save apil agensem i go long Apil
Kot mo bambae hemi mekem sam rul tu we bambae oli kavremap ol kaen apil
we oli go long Apil Kot we insaed bambae i 2 o moa jaj blong Suprim Kot
we bambae oli lukluk long keis ia.
FASIN BLONG FAENEMAOT
STRET OL RUL
BLONG KASTOM
51. Palemen bambae i save mekem ol rul blong faenemaot gud
ol rul blong kastom blong bifo mo bambae hem i save mekem rod blong man
we i save gud ol kastom blong bifo i sidaon wetem ol jaj long Suprim
Kot o Apil Kot mo blong hemi tekempat long ol wok blong kot ia.
OL VILIJ KOT MO AELAN KOT
52. Palemen bambae i mekem ol loa blong stanemap ol velej kot mo aelan
kot we bambae oli gat paoa blong jajem ol keis long saed blong kastom
wetem sam narafala keis tu mo bambae Palemen i mekem rod blong ol jif
oli wok long ol kot ia tu.
MAN WE I LUK SE NARAFALA
MAN I MEKEM FASIN LONG HEM WE I NO STRET LONG
KONSTITUSEN IA I SAVE PUTUM KEIS BLONG HEM LONG SUPRIM KOT
53. (1) Sipos wan man i luk se narafala man i mekem wan fasin long hem
we i no stret long Konstitusen ia, bambae hemi save askem long Suprim
Kot blong i lukluk long keis blong hem ia. Be hemia i no stopem hem
blong folem wan narafala rod blong oli lukluk long keis blong hem ia.
(2) Suprim Kot bambae i gat paoa blong lukluk long ol keis olsem mo
blong mekem eni desisen we bambae fosem man we i rong blong hemi folem
ol rul insaed long Konstitusen ia.
(3) Sipos wan narafala kot i stap jajem wan keis long saed blong mining
blong wan rul insaed long Konstitusen ia, mo jaj blong kot ia i luk se
keis ia i konsenem wan bigfala poen long loa, bambae jaj ia i askem
blong Suprim Kot blong i lukluk keis ia mo givim givim wan desisen long
hem.
OL KOMPLEN LONG SAED
BLONG ELEKSEN
54. Bambae Suprim Kot nomo i gat paoa blong jajem ol komplen blong
eleksen. Suprim Kot ia nomo bambae i save talem we fasin we oli folem
blong jusumaot man i kam memba blong Palemen, o memba blong Nasonal
Kaonsel blong olgeta Jif, o memba blong Lokol Gavman Kaonsel i stret o
i no stret. Suprim Kot nomo bambae i save talem se memba olsem i aot
long jea blong hem o hemi no kwalifae blong holem wok ia.
PABLIK PROSEKUTA
55. Folem ol advaes we hemi kasem long Judisol Sevis
Komisen, Presiden blong Ripablik bambae i apoentem wan man blong holem
wok olsem Pablik Prosekuta mo wok bong man ia hemi blong talemaot ol
trabol long Kot. Bambae hemi wok indipenden nomo mo bambae i no gat
narafala man i save tok long hem from, o i save kam bos long hem, hem
nomo bambae i bos long wok we i stap long han blong hem.
PABLIK
SOLISITA
56. Palemen bambae i mekem loa blong stanemap wok blong Pablik
Solisita we Presiden blong Ripablik bambae i apoentem hem. Wok blong
Pablik Solisita hemi blong givhan long eni man we i nidim help.
JAPTA 9
ADMINISTREISEN
PAT 1 - PABLIK SEVIS
OLGETA PABLIK SEVEN
57. (1) Olgeta pablik seven bambae oli wok wetem respek long
Konstitusen ia mo vois blong ol sitisen blong Ripablik blong Vanuatu.
(2) Ol sitisen blong Ripablik blong Vanuatu nomo bambae oli holem ol
wok blong insaed long Gavman. Pablik Sevis Komisen bambae i lukluk long
ol narafala kwalifikeisen blong apoentem man i go insaed long Pablik
Sevis.
(3) Pablik Sevis Komisen i no save putum wan man long wan post
we i kamaot folem wan loa.
(4) Sipos i gat spesel keis, Praem Minista o
Presiden blong Lokol Gavman Kaonsel i save askem blong oli tekem sam
man blong wok blong smol taem nomo from i gat sam wok blong Gavman we i
jes kamaot be oli bin plan from.
Be sipos i gat wan ejen keis i kamap, bambae Pablik Sevis Komisen i
save mekem wan desisen olsem long ples blong Praem Minista hemia afta
we hemi toktok wetem Minista blong Faenans mo Minista we i lukaot long
pablik administreisen.
(5) Sipos i gat ol post yet folem loa bambae ol
pablik seven oli gohed blong holem wok blong olgeta, be bambae Gavman i
tekemaot hem long wok nomo folem Konstitusen ia.
(6) Gavman bambae i givim inkris long salari blong olgeta pablik seven
olsem we ol loa blong Ripablik blong Vanuatu i talem.
(7) Sipos pablik seven i kasem we yia blong hemi ritae bambae hemi
finis long wok blong Gavman o sipos Pablik Sevis Komisen i sakemaot hem
long wok. Gavman bambae i no save daonem taetol mo salari blong wan
pablik seven sipos hemi no toktok wetem Pablik Sevis Komisen yet.
(8)
Rul we i stap long sab-atikol (5) antap bambae i no save blokem Gavman
blong givim kompolsori eli ritaemen long ol pablik seven, folem stret
fasin we loa i talem, blong mekem se hemi save karem ol niu man blong
fulmap ol post ia.
FASIN BLONG TRANSFEREM
WAN PABLIK SEVEN MO RAET
BLONG NO LUSUM WOK I NO APLAE LONG OL POLITIKOL ADVAESA
58. (1) Rul we
i stap long Atikol 55 (5) antap bambae i no aplae long ol politikol
advaesa blong Praem Minista mo ol narafala Minista.
(2) Praem Minista i
gat paoa blong transferem eni senia pablik seven insaed long ol defren
ministri i go long wan narafala wok we level blong hem i semak long
hemia we hemi stap long hem fastaem.
OL MEMBA BLONG PABLIK
SEVIS
KOMISEN
59. (1) Insaed long Pablik Sevis Komisen bambae i gat faef
memba we bambae Presiden blong Ripablik bambae i apoentem olgeta afta
we hemi toktok wetem Praem Minista fastaem mo bambae memba blong
Komisen ia oli holem wok ia blong tri yia.
(2) Long evri yia Presiden blong Ripablik bambae i apoentem wan long ol
memba blong Komisen ia blong i holem wok olsem Jeaman we diuti blong
hem hemi blong arenjem ol miting blong Komisen.
(3) Sipos wan man we i memba blong Pablik Sevis Komisen i winim eleksen
blong kam wan memba blong Palemen, o i kam wan memba blong Nasonal
Kaonsel blong olgeta Jif, o i kam wan memba blong wan Lokol Gavman
Kaonsel, o oli givim wan hae wok long hem long wan politikol pati,
bambae i no save holem wok olsem memba blong Komisen.
(4) Wan memba blong Komisen bambae i lusum jea blong hem sipos hemi
mekem wan fasin o wan samting we sipos i bin mekem fastaem bifo i holem
wok ia bambae oli no save putum hem i kam memba blong Komisen ia.
OL
WOK BLONG PABLIK SEVIS KOMISEN
60. (1) Hemi diuti blong Pablik Sevis
Komisen blong apoentem mo promotem ol pablik seven mo blong jusum ol
pablik seven we oli mas go long ol trening kos insaed long Vanuatu o
long ovasi. Blong mekem hemia, hemi save oganaesem sam eksam we oli man
i save kompit long hem blong winim ples.
(2) Hemi diuti blong Pablik
Sevis Komisen tu blong disaplinim ol pablik seven.
(3) Pablik Sevis
Komisen i no gat paoa ova long judisori, ami, polis fos mo tijing
sevis.
(4) Pablik Sevis Komisen bambae hemi wok indipenden nomo mo
bambae i no gat narafala man i save tok long hem from wok we hemi stap
mekem, o i save kam bos long hem mo hem nomo bambae i bos long wok we i
stap long han blong hem.
PAT 2 - OMBUDSMAN
OMBUDSMAN
61. (1) Afta we Presiden blong Ripablik i toktok wetem Praem Minista,
Spika blong Palemen, ol lida blong ol pati blong politik we oli gat
memba long Palemen, Presiden blong Nasonal Kaonsel blong olgeta Jif, ol
Presiden blong ol Lokol Gavman Kaonsel, Jeaman blong Pablik Sevis
Komisen mo Jeaman blong Judisol Sevis Komisen bambae hemi apoentem wan
Ombusdman we bambae hemi holem wok blong 5 yia.
(2) Wan man i no save
holem wok olsem Ombudsman sipos hemi wan memba blong Palemen, o memba
blong Nasonal Kaonsel blong olgeta jif, o memba blong wan Lokol Gavman
Kaonsel, o i holem wok long wan narafala pablik ofis o hemi holem wok
insaed long wan politikol pati.
(3) Ombudsman bambae i lusum wok blong hem sipos hemi mekem wan fasin o
wan samting we sipos i bin mekem fastaem bifo i holem wok ia bambae oli
no save putum hem i kam olsem Ombudsman.
OL ENKWAERI WE OMBUDSMAN I
SAVE MEKEM
62. (1) Ombudsman bambae i gat raet blong mekem enkwaeri long fasin o
wok blong wan man o bodi we Atikol ia i kavremap:
(a) Sipos hemi kasem wan
komplen ong wan memba blong pablik (o sipos
memba blong pablik ia hemi no save mekem, bamba i save kam long
ripresentativ blong hem o wan
memba blong famli blong hem) we i kleim se hemi safa from i gat
injastis i kamaot folem fasin o wok blong wan man o bodi;
(b) Folem
rikwes blong wan Minista, o wan memba blong Palemen, o wan memba blong
Nasonal Kaonsel blong olgeta Jif, o wan memba blong wan Lokol Gavman
Kaonsel; o
(c) Folem tingting blong hemwan nomo.
(2) Ol rul insaed long
Atikol ia bambae oli kavremap evri pablik seven, pablik otoriti mo ol
dipatmen anda long ol ministri be i no Presiden blong Ripablik, Judisol
Sevis Komisen, Suprim Kot mo ol narafala judisol bodi.
(3) Ombudsman ia
bambae i gat paoa blong askem wan Minista, pablik seven, administreta,
otoriti o eni narafala man blong helpem hem long wok blong hem, givim
hem sam infomeisen mo dokumen we hemi nidim long ol enkwaeri.
(4)
Ombudsman bambae i givim janis long man o bodi ia we oli stap mekem
komplen agensem blong hemi ansa long ol komplen we oli stap mekem
agensem hem.
(5) Ombudsman bambae i mekem ol enkwaeri blong hem long
praevet.
OL SAMTING WE OMBUDSMAN I
FAENEMAOT MO OL RIPOT BLONG HEM
63. (1) Sipos afta long plante wok Ombudsman i fainemaot se komplen we
memba blong pablik i mekem i no tru, bambae hem i talemaot long man ia
we i komplen se wanem we hemi talem i no gat stamba blong hem mo bamba
hemi talemaot desien blong hem ia tu long Praem Minista mo hed blong
gavman dipatmen o otoriti we komplen ia i kavremap hem tu.
(2) Sipos
afta long plante wok Ombudsman i fainemaot se fasin o wok ia we oli
mekem komplen agensem i brekem loa from man i no save gud ol loa o i no
save wanem tru samting nao i hapen, o from hemi tekem tumas taem blong
mekem wok blong hem be i no gat gud risen blong hem, o from hemi mekem
wan samting we i no stret long narafala man, o from i mekem kranke wok
nomo long hem, mo from risen ia nao hemi ting se oli mas kanselem o
jenisem eni desisen we i kamaot o eni fasin blong wok we oli bin stap
folem long bifo finis i kam oli mas jenisem, bambae hemi mas talemaot
wanem we hemi fainem long Praem Minista mo hed blong gavman dipatmen o
otoriti we komplen ia i kavremap hem tu.
(3) Eni man long pablik i save
ridim o luk ridim blong Ombudsman sipos Ombudsman i no blokem se Praem
Minista wetem hed blong gavman dipatmen nomo we ripot ia i kavremap hem
tufala i save luk ful ripot ia o wan pat blong hem from sefti o intres
blong pablik. Be bambae Ombudsman i mas talemaot ol samting we hemi
fainem long man o bodi we i mekem komplen.
(4) Praem Minista o hed
blong gavman dipatmen we ripot ia i kavremap hem bambae i no mas tekem
tumas taem blong disaed long wanem we Ombudsman i fainemaot. Afta
bambae hemi mas talemaot desisen we hemi tekem wetem ol risen bihaen
long hem i go long long man we i mekem komplen. Eni period we i putum
limit long taem we ol wok blong kot i mas gohed long hem bambae i no
save stat kasem taem we man we i mekem komplen i kasem desisen ia.
(5)
Ombudsman bambae i sabmitim ol ripot long saed blong wok blong hem i go
long Palemen evri yia mo sipos i luk se i gat nid long hem, bambae hemi
save mekem ol narafala ripot bakegen long saed blong wok blong hem mo
wanem hemi mekem folem ol samting we hemi faenemaot. Hemi save talemaot
long Palemen wanem samting we i no stret long saed blong wok blong
administreisen.
RAET BLONG WAN SITISEN
BLONG KASEM SEVIS LONG LANGWIS
WE HEMI SAVE GUD
64. (1) Hemi raet blong wan sitisen blong Vanuatu blong i save kasem
sevis we ol ofis blong Gavman blong Ripablik blong Vanuatu oli stap
givim long ofisol langwis we hemi stap yusum.
(2) Sipos wan sitisen i
luk se i gat wan rong agensem sab-atikol (1) antap bambae hemi save
talemaot rong ia long Ombudsman blong Ombudsman i save mekem wan
enkwaeri folem ol rul insaed long Atikol 62 mo 63 antap.
(3) Evri yia bambae Ombudsman i mas mekem spesel ripot i go long
Palemen abaot long fasin we ol man oli stap yusum trifala lanwis ia
wetem ol narafala lanwis tu long Ripablik blong Vanuatu mo long ripot
ia, bambae Ombudsman i save tokbaot ol rod we kaontri i save folem
blong mekem ol man oli respektem mo holem taet olgeta lanwis blong
Ripablik blong Vanuatu.
OMBUDSMAN NOMO I BOS
BLONG WOK BLONG HEM
65. Sipos Ombudsman i stap mekem wok blong hem bambae i no gat wan man
i save tok long hem from, o bos blong hem from hem nomo bambae i bos
long wok we i stap long han blong hem.
JAPTA 10
LIDASIP KOD
FASIN BLONG OL LIDA
66. (1) Hemi diuti blong eni man we ol pipol i
lukluk long hem olsem wan lida folem Atikol 67, blong kontrolem fasin
blong hem insaed long pablik mo praevet laef blong hem blong mekem se
hemi no:
(a) putum hem long wan
posisen we i save mekem se i gat wan konflik
blong ol intres o bambae i mekem se ol man long pablik oli save stap
askem kwesten abaot olgeta pablik o ofisol diuti blong hem;
(b) rabisim
nem blong ofis o posisen blong hem;
(c) mekem se ol man long pablik i
askem kwesten abaot integriti blong hem; o
(d) putum long denja o mekem se ol man oli nomo respektem mo no gat
trast long integriti we Vanuatu Gavman i gat.
(2) Andap long hemia, wan
lida hemi no save yusum ofis blong hem blong hemi winim samting long
pesonal intres blong hem o blong hemi mekem bisnis o blong hemi joen
long eni bisnis o aktiviti we bambae i save mekem se pablik hemi resem
kwesten sipos hemi stap mekem ol diuti blong hem olsem we sab-atikol
(1) i talem o no.
FASIN WE BAMBAE OL LIDA
BLONG KAONTRI OLI FOLEM
67. Ol lida we Japta ia i tokbaot i gat Presiden blong Ripablik, Praem
Minista, ol Minista blong Gavman, ol memba blong Palemen, mo samfala
pablik seven, ofisa blong Gavman we loa i kavremap olgeta.
PALEMEN BAMBAE
I MEKEM LOA FROM OL FASIN IA
68. Palemen bambae i apruvum loa blong mekem ol rul insaed long Japta
10 i gat paoa.
JAPTA 11
OL PAOA LONG SAED BLONG
EMEJENSI
OL SPESEL LOA LONG SAED BLONG EMEJENSI
69. Kaonsel blong ol Minista i save mekem ol loa blong dil wetem eni
emejensi, hemia olgeta taem olsem:
(a) Sipos i gat wan wo
long Ripablik
blong Vanuatu;
(b) Sipos Presiden blong Ripablik i diklerem, folem
advaes blong Kaonsel blong ol Minista, se hemi taem blong emejensi
folem wan natural disasta, o from ol man oli stap faet mo hemi toktok
ia wetem tingting blong putum bak pis bakegen.
PERIOD BLONG EMEJENSI MO
FASIN BLONG PUTUM BAK PERIOD BLONG EMEJENSI
70. (1) Sipos Palemen i
stap miting be i gat wan period blong emejensi we oli diklerem folem
Atikol 69, bambae taem blong emejensi ia stop long en blong 1 wik be
bambae i save bitim 1 wik sipos Palemen i agri long hem long wan
resolusen we tu ted blong ol memba blong hem oli sapotem.
(2) Sipos
Palemen i no stap miting be i gat wan period blong emejensi bambae
period blong emejensi ia i stop long en blong 2 wik.
(3) Sipos Palemen i pasem wan resolusen folem sab-atikol (1), period
blong emejensi we resolusen ia i kavremap bambae i stap long period we
oli raetem i stap long resolusen be hemia nomo, wan period blong
emejensi i no save stap kasem ova long 3 manis long wan taem.
(4) Sipos
i gat wan period blong emejensi, hemia bambae i no blokem Palemen blong
holem miting.
(5) Palemen i no save disolv folem ol toktok we i stap long Atikol
28(2) o 28(3) long taem blong emejensi. Sipos wok blong Palemen i finis
folem ol toktok we i stap long Atikol 28(1) long taem blong emejensi,
olgeta memba blong Palemen we oli jas finis oli save miting blong
lukluk nomo long saed blong taem blong emejensi go kasem taem we niu
Palemen i holem fes miting blong hem.
(6) Palemen i save pasem wan
resolusen long eni taem blong stopem period blong emejensi sipos tu ted
blong ol memba blong hem oli sapotem resolusen ia.
OL SAMTING WE OL SPESEL
LOA WE OLI MEKEM LONG BIGFALA TAEM BLONG TRABOL
OLSEM OLI SAVE TALEM
71. (1) Nomata long ol toktok we i stap insaed long Pat I blong Japta 2
blong Konstitusen ia, eni reguleisen we Kaonsel blong ol Minista i
apruvum folem Atikol 69 bambae i gat ful paoa be hemia nomo se i no mas
gat wan reguleisen we bambae i:
(a) blokem raet blong man
i gat wan laef mo blong hemi no kasem ol
rabis fasin o blong oli fosem hem blong wok olsem wan animol; mo
(b) mekem se polis i holem taet wan man moa long wan manis wetaot janis
blong go long kot be bambae hemi save mekem nomo sipos man ia hemi wan
enemi blong hem from kaontri blong hem i stap faet agensem Ripablik
blong Vanuatu.
(2) Ol reguleisen ia we Kaonsel blong ol Minista i mekem
folem Atikol 69 i mas gat bigfala nid blong hem folem emejensi we i
stap kavremap mo oli stret wetem fasin blong wan demokratik kaontri.
OL
KOMPLEN WE I GO LONG SUPRIM KOT FROM OL EMEJENSI REGULEISEN
72. Sipos wan sitisen i ting se wan reguleisen we Kaonsel blong ol
Minista i mekem folem Atikol 69 i mekem hem i safa bambae hemi save
askem long Suprim Kot, we i gat bigfala paoa, sipos reguleisen ia o
evri reguleisen ia oli stret o no.
JAPTA 12
GRAON
GRAON I BLONG OL KASTOM
ONA
73. Evri graon long Ripablik blong Vanuatu i blong ol stret kastom ona
wetem ol pikinini blong olgeta.
FASIN BLONG ONEM GRAON MO
BLONG YUSUM GRAON
74. Fasin blong onem mo yusum graon long Ripablik blong Vanuatu bambae
i folem fasin we ol kastom rul blong bifo i putum.
GRAON WE MAN I ONEM LONG
FASING BLONG FRI-HOL TAETOL
75. Olgeta sitisen blong Ripablik blong Vanuatu we oli stret netiv
bambae oli save holem graon long fasin blong fri-hol taetol we i folem
wan sistem blong onem graon we ol pipol oli agri long hem mo akseptem.
NASONAL LOA LONG SAED
BLONG GRAON
76. Afta we hemi toktok wetem Nasonal Kaonsel blong olgeta jif, Palemen
bambae i mekem wan nasonal loa blong graon we bambae i mekem se ol rul
we i stap insaed long Atikol 73, 74 mo 75 oli gat paoa mo bambae hemi
save mekem ol narafala loa tu we bambae oli kavremap ol narafala kaen
graon bakegen we wan long olgeta nao hemi graon long taon.
KOMPENSESEN
LONG SAED BLONG GRAON
77. Palemen bambae i mekem sam rul we bambae oli folem blong wokemaot
ol kompensesen mo fasin we bambae oli pem ol kompensesen ia long hem i
go long ol man we ol rul anda long Japta ia i afektem ol intres blong
olgeta.
OL RAO FROM GRAON
78. (1) Sipos i gat graon we netif i talem se i blong hem, be narafala
man i stap yusum, nao i gat rao from graon ia from ol rul insaed long
Japta ia, bambae Gavman i holem graon ia gogo kasem taem we oli stretem
rao ia.
(2) Gavman blong Ripablik blong Vanuatu bambae i mekem rod blong
stretem ol rao blong ol kastom ona from ol graon blong olgeta long
fasin we i folem ol loa blong kastom wetem ol fasin blong hem.
BISNIS BLONG SALEM MO PEM
GRAON
79. (1) Nomata wanem rul i stap insaed
long Atikol 73, 74 mo 75, sipos wan stret netif blong Ripablik blong
Vanuatu i wantem givim wan pis graon long wan man narafala ples we i
karem sitisen blong Ripablik blong Vanuatu o long wan man we i no
sitisen blong Ripablik blong Vanuatu, hemi mas askem raet long Gavman
fastaem.
(2) Oltaem Gavman bambae i givim raet long stret netif blong i
givim graon olsem sabatikol (1) i talem, be bambae hemi no save givim
raet ia sipos hemi luk se bambae hemi spoelem intres blong:
(a) olgeta
kastom ona blong graon ia;
(b) stret netif long keis we hemi no kastom
ona blong graon ia;
(c) komuniti we graon ia i stap long eria blong hem;
(d) Ripablik blong Vanuatu.
GAVMAN I SAVE ONEM GRAON
80. Nomata wanem rul i stap insaed long Atikol 73 mo 74 andap, Gavman i
save pemaot graon long ol kastom ona blong hemi yusum long saed blong
pablik intres.
GAVMAN I SAVE SEREMAOT
GRAON LONG OL MAN WE OLI SOT LONG
GRAON
81. (1) Nomata wanem rul i stap insaed long Atikol 73 mo 74 andap,
Gavman i save pemaot graon long kastom ona wetem tingting blong
transferem taetol blong hem i go long narafala man we i stret netif o i
go long wan komuniti blong ol stret netif we oli kamaot long wan aelan
blong Vanuatu we i no gat inaf graon long hem.
(2) Taem Gavman i
givimaot graon long sam narafala man long fasin we i stap insaed long
sab-atikol (1), bambae hemi lukluk fastaem long laen blong tufala,
langwis blong tufala, kastom blong tufala, mo ples we tufala i stap
long hem blong mekem se bambae tufala i save stap gud wanples.
JAPTA 13
DISENTRELAESEISEN
LOA BLONG
DISENTRELAESEISEN
82. Ripablik blong Vanuatu, we i luksave impotens blong
disentrelaeseisen blong mekem se ol pipol oli save tekempat fulwan long
ol wok blong lukaotem lokol gavman rijen blong olgeta, bambae hemi
apruvum sam loa we bambae oli yusum blong mekem tingting ia i kam tru.
OL LOKOL GAVMAN KAONSEL
83. Loa blong disentrelaeseisen we bambae i kamaot bambae i divaedem
Ripablik blong Vanuatu i go long ol Lokol Gavman Rijen mo bambae i
mekem se wan Lokol Gavman Kaonsel i lukaot long ol administreisen wok
blong wanwan rijen mo insaed long Kaonsel ia bambae i gat ol
representatif blong ol jif.
JAPTA 14
FASIN BLONG MEKEM
AMENDMEN LONG KONSTITUSEN
OL BIL BLONG MEKEM
AMENDMEN LONG KONSTITUSEN
84. Praem Minista o wan memba blong Palemen i save putum wan bil i kam
long Palemen long saed blong jenisim sam toktok blong Konstitusen ia.
FASIN BLONG WOK FOLEM
BLONG MEKEM AMENDMEN LONG KONSTITUSEN
85. Wan bil blong mekem amendmen long Konstitusen i save gat paoa nomo
sipos bil ia i kasem sapot blong moa long tu ted blong evri memba blong
Palemen we oli stap long wan spesel siting we i gat insaed kworom blong
tri kwota blong evri memba i stap. Sipos i no gat wan kworom olsem ia
long fes siting, Palemen i save mit bakegen wan wik afta mo semak
majoriti ia oli save mekem wan desisen long hem nomata sipos tu ted
nomo blong ol memba i stap long taem ia.
BLONG MEKEM AMENDMEN LONG
KONSTITUSIN IA, BAMBAE OL SITISEN OLI MAS MEKEM REFERENDOM FASTAEM
BLONG SOEMAOT TINGTING BLONG OLGETA
86. Wan bil blong mekem amendmen long Konstitusen long saed blong fasin
blong yusum trifala langwis ia Bislama, Inglis mo Franis long kaontri
ia, o long saed blong mekem eleksen, o long saed blong sistem blong
Palemen we oli pasem folem Atikol 85 bambae i save gat paoa nomo sipos
ol sitisen oli sapotem tru long wan referendom.
JAPTA 15
TAEM WE REPRESENTATIF
ASEMBLI I FINIS MO GAVMAN BLONG RIPABLIK BLONG
VANUATU I STANAP
FES PRESIDEN BLONG
RIPABLIK
87. Nomata wanem toktok i stap long Japta 6, fes Presiden blong
Ripablik bambae hemi:
(a) wan man we ol memba
blong Representatif Asembli wetem ol Presiden
blong ol Rijenol Kaonsel, sipos oli stanemap olgeta finis long taem ia,
we oli mekemap elektoral kolej oli elektem hem long dei bifo long Dei
blong Indipendens;
(b) stat blong mekem ol wok blong Presiden stat long
Dei blong Indipendens mo bambae hemi wok folem ol toktok insaed long
Konstitusen ia.
FES PRAEM MINISTA MO OL
FES MINISTA
88. Man we i Jif Minista long dei bifo long Dei blong Indipendens
bambae hemi kam Praem Minista blong Ripablik blong Vanuatu mo ol
Minista long dei bifo long Dei blong Indipendens bambae oli kam ol
Minista mo bambae oli holem ol wok ia olsem oli elektem o apoentem
olgeta folem ol toktok blong Japta 7 i talem.
FES PALEMEN
89. (1) Ol man we long dei bifo long Dei blong Indipendens oli memba
blong Representatif Asembli bambae olgeta oli kam memba blong Palemen
mo bambae oli kipim jea blong olgeta long Palemen folem ol toktok
insaed long Konstitusen ia.
(2) Man we long dei bifo long Dei blong Indipendens hemi Jeaman blong
Reresentatif Asembli bambae hemi holem wok olsem Spika blong Palemen go
kasem taem we oli jusum wan narafala man blong holem wok ia.
(3) Ol rul we Representatif Asembli i stap folem blong mekem wok blong
hem long dei bifo long Dei blong Indipendens bambae Palemen i wok folem
ol rul ia go kasem taem we hemi jenisim olgeta lelbet blong mekem oli
stret long fasin blong hem, o i mekem ol niufala rul blong jenisim
olgeta olsem we toktok long Atikol 21(5) i talem be bambae Palemen i
mekem sua eni jenis we hemi mekem long mining blong ol olfala rul ia i
stret gud wetem ol toktok blong Konstitusen ia.
(4) Palemen bambae i disolv long namba 14 Novemba 1983, hemia sipos oli
no disolvem fastaem bifo long deit ia.
OL MAN WE OLI STAP WOK
BLONG
GAVMAN
90. (1) Sipos i no gat narafala toktok long Konstitusen ia, wan man we
long dei bifo long Dei blong Indipendens hemi stap holem wan wok long
Gavman blong Ripablik blong Vanuatu bambae hemi gohed blong wok long
ofis ia o long wan semak ofis we oli setemap folem Konstitusen mo
bambae ol tem mo kondisen blong wok i semak nomo olsem olgeta we hemi
bin stap wok folem bifo long dei ia.
(2) Sab-atikol (1) antap bambae i
no save blokem Palemen long paoa blong hem blong givim kompolsori
ritaemen long ol ofisa we oli wok insaed long Gavman be oli no stret
sitisen blong kaontri ia hemia blong mekem nomo se oli save putum ol
stret sitisen blong Ripablik blong Vanuatu blong oli holem ol wok ia.
(3) Nomata wanem toktok i stap long Atikol 55(2), sipos i no gat wan
stret sitisen blong Ripablik blong Vanuatu we i inaf blong holem wan
kaen wok insaed long Gavman, Gavman bambae i save putum wok ia long han
blong wan man narafala kaontri, be long keis blong wan jaj blong Suprim
Kot, bambae hemi holem wok blong smol taem nomo olsem we Gavman i
talem.
OL JAJ BLONG SUPRIM KOT
91. Nomata wanem toktok i stap long Japta 8, wan man we stret long dei
bifo long Dei blong Indipendens hemi bin stap holem wok olsem wan jaj
long Suprim Kot o long wan Distrik Kot we i stap bifo Indipendens,
bambae i holem wok olsem jaj blong Suprim Kot go kasem taem we oli
apoentem wan man i go long ofis ia folem Japta 8. Presiden blong
Ripablik i save apoentem wan long ol jaj ia blong i holem wok olsem Jif
Jastis go kasem taem we bambae oli apoentem wan stret man blong holem
wok olsem Jif Jastis.
OLGETA SAMTING WE GAVMAN
BLONG RIPABLIK BLONG VANUATU I GAT RAET BLONG
MEKEM, O I AGRI BLONG MEKEM O I PROMES BLONG MEKEM
92. (1) Long dei ia
we Ripablik blong Vanuatu bambae i kam indipenden, olgeta samting we
fastaem Gavman blong Niu Hebredis i gat raet blong mekem, olgeta
samting we hemi promes blong mekem mo olgeta samting we hemi agri blong
mekem bambae oli kam anda long responsibiliti blong Gavman blong
Ripablik blong Vanuatu sipos oli kamaot folem wan kontrek o wan
narafala rod.
(2) Olgeta toktok insaed long sab-atikol (1) antap oli no
save stopem Gavman blong Ripablik blong Vanuatu blong hemi go toktok
bakegen abaot raet blong mekem samting, agrimen blong mekem samting o
promes blong mekem samting we sabatikol ia i tokbaot.
SISTEM BLONG
ELEKSEN
93. Afta long ol jenerol eleksen we i folem taem we Gavman blong Inglan
mo Gavman blong Franis i ekjensim leta long tufala blong givim paoa
long ol toktok insaed long Atikol ia, Ripresentatif Asembli bambae i
putumap wan Komiti we insaed i gat sem namba blong ol pipol we oli
kamaot long evri politikol grup mo Komiti ia nao bambae i lukluk long
fasin blong mekem eleksen, blong i save givim tok long Palemen long sam
niufala fasin blong mekem eleksen folem Atikol 17(1). Wanem tingting
Komiti i kamap wetem bambae oli putum long wan loa we Palemen bambae i
lukluk long hem be loa ia bambae i save gat paoa nomo sipos hemi kasem
sapot blong moa long tu ted blong evri memba blong Palemen we oli stap
long wan spesel siting we i gat insaed kworom blong tri kwota blong
evri memba i stap. Sipos i no gat wan kworom olsem ia long fes siting,
Palemen i save mit bakegen wan wik afta mo semak majoriti ia oli save
mekem wan desisen long hem nomata sipos tu ted nomo blong ol memba i
stap long taem ia.
OL KEIS WE I STAP LONG FORET BLONG KOT
94. Evri sivil o kriminal keis we i stap long foret blong eni kot blong
Ripablik blong Vanuatu long dei bifo long Dei blong Indipendens bambae
oli mas dil wetem long dei ia o afta long dei ia folem eni jenerol o
spesel toktok we i kam long Suprim Kot anda eni loa we Palemen i pasem
blong kavremap saed ia.
OL LOA WE I STAP BIFO RIPABLIK BLONG VANUATU I
KASEM INDIPENDENS
95. (1) Go kasem taem we Palemen i mekem sam narafala loa blong tekem
ples blong olgeta, evri Joen Reguleisen wetem ol smolsmol loa mo rul we
oli kamaot folem ol Joen Reguleisen ia we oli gat paoa i stap long dei
bifo long Dei blong Indipendens bambae oli gohed blong gat paoa long
dei ia o afta long dei ia olsem se oli bin kamaot folem Konstitusen ia
mo bambae Palemen i mekem sua eni jenis we hemi mekem long mining blong
ol olfala loa o rul ia i stret gud wetem ol toktok blong Konstitusen
ia.
(2) Go kasem taem we Palemen i mekem sam narafala loa blong tekem ples
blong olgeta, ol loa blong Inglan mo Franis we oli gat paoa i stap long
Ripablik blong Vanuatu long dei bifo long Dei blong Indipendens, bambae
oli gohed blong gat paoa long dei ia o afta long dei ia sipos oli no
kanselem olgeta o oli no go agensem indipenden steitas blong Vanuatu mo
long sipos i posibol oli mas kavremap kastom blong kaontri.
(3) Long
dei we Ripablik blong Vanuatu i kam indipenden, ol loa blong kastom
bambae oli gohed blong gat paoa mo bambae oli kam pat blong ol loa
blong Ripablik blong Vanuatu.
SPESEL RUL 1
(Atikol 34)
ELEKSEN BLONG PRESIDEN BLONG
RIPABLIK
1. Sipos Presiden blong Ripablik i finis long wok blong hem, Elektoral
Kolej bambae i mas mit bifo tri wik i pas afta we Presiden i finis wok
blong elektem wan man blong hemi kam nekis Presiden blong Ripablik.
2.
(1) Elektoral Kolej bambae i gohed blong elektem Presiden blong
Ripablik sipos tri kwota blong ol memba blong hem oli stap long fes
miting blong hem ia.
(2) Be sipos i no gat tri kwota blong ol memba
blong Elektoral Kolej long fes miting ia, bambae Kolej i save mit
bakegen taem we foti eit haoa i pas mo bambae hemi stret nomo wetem loa
blong seken miting ia i gohed blong elektem wan niu Presiden sipos i
gat tu ted blong ol memba blong Kolej o moa oli stap long taem ia.
3.
Kandidet we i winim vot blong tu-ted blong olgeta memba blong Elektotal
Kolej bambae hemi holem wok olsem nekis Presiden blong Ripablik.
SPESEL
RUL 2
(Atikol 41)
ELEKSEN BLONG PRAEM MINISTA
1. Kandidet we i winim vot blong bigfala majoriti blong olgeta memba
blong Palemen bambae hemi holem wok olsem Praem Minista.
2. Sipos ol
memba blong Palemen oli vot be oli no elektem wan man folem paragraf 1
antap, bambae oli mekem narafala vot bakegen be kandidet we i gat smol
namba olgeta long vot we oli mekem fastaem bambae oli tekemaot nem
blong hem taem oli mekem narafala vot ia.
3. Sipos long seken vot ia i no gat man i kasem namba ol sem we
paragraf 1
i talem, bambae oli stap vot bakegen. Be ol taem oli mas tekemaot nem
blong man we i kasem smol namba olgeta long vot we oli jes mekem.
Bambae oli mekem olsem ia gogo kasem taem we wan man i kasem namba ia
we paragraf 1 i talem, o sipos i gat tu kandidet nomo i stap, kandidet
we i kasem vot blong simpol majoriti blong ol memba bambae hemi kam
Praem Minista.
PacLII: Copyright
Policy | Disclaimers
| Privacy
Policy | Feedback|
Report
an error
URL: http://www.paclii.org/vu/legis/konstitusen1988.html
